Lo professor occitan Bernat Vernhièras participarà als corses d’occitan del CAÒC los jorns 14, 15 e 16 de decembre.
Tres jornadas per conéisser las letras occitanas de la man de Bernat Vernhièras, professor de tria que lo diluns nos presentarà lo libre d’ont se tirarà lo tèxt de la dictada que se devanarà lo 30 de genièr e nos rapelarà qualques règlas de l’ortografia occitana. Lo dimars serà l’escasença per nos avançar al Nadal amb contes e cançons en occitan. E lo dimècres nos parlarà sus Joan Bodon, poèta, contaire e romancièr occitan que defuntèt fa 40 ans.
Nascut fin de 1945 a La Vaur, en Lauragués, Vernhièras es estat totjorn professor, en primièr de filosofia pendent 8 ans; puèi d’annadas a ensenhar lo francés a l’estrangièr e tanben a Barcelona, foguét aquí quan lo 1978 descobriguèt los reviscòls catalan e occitan a l’escasença d’una setmana culturala occitana organizada pel CAOC ! atau debutèt amb un cors d’occitan pel CAOC, e dempuèi lo 1992 es professor d’occitan. Començèt l’ensenhament de l’occitan a Castras, tanben es professor d’occitan a Escòla Occitana d’Estiu e fa d’activitats dins l’encastre del Centre Occitan del País Castrés.
Aicestas tres jornadas occitanas que farà al CAOC son per totes los sòcis e public interessat:
CONVÈRSAS AMB BERNAT VERNHIÈRAS:
DILUNS 14 DE DESEMBRE 2015: “PREPARACION A LA DICTADA OCCITANA”
Rapelar, precisar las règlas ortograficas, l’accentuacion, etc… Presentar lo libre d’ont serà tirat lo tèxt.
CAOC, Providència 42, Gràcia, Barcelona, de 19 a 21 oras
DIMARS 15 DE DESEMBRE 2015: “VELHADA CONTAIRA DE CONTES DE NADAL”
Ambe qualques cants de Nadal, per alternar ambe los contes.
CAOC, Providència 42, Gràcia, Barcelona, de 19 a 21 oras
DIMÈCRES 16 DE DESEMBRE 2015: “40 ANS DE LA DESPARTIDA DE JOAN BODON 1975‐2015”
Presentacion de l’òme, sa vida, son òbra, qualques claus d’interpretacion, lectura de qualques tèxtes o escota de qualques poèmas cantats per d’interprètas coma Mans de Brèish o autres…
CAOC, Providència 42, Gràcia, Barcelona, de 19 a 21 oras