Eth Govèrn dera Generalitat a aprovat eth decret peth quau s’autrege ar Institut d’Estudi Aranesi eth caractèr d’acadèmia e d’autoritat lingüistica der occitan, aranés ena Val d’Aran. Er occitan ei era lengua pròpria d’Aran, a on ei nomentada aranés, e ei lengua oficiala en conjunt de Catalonha d’acòrd damb er estatut de 2006. Er encastre d’accion der Institut d’Estudis Aranesi ei Catalonha.
Er objècte der Institut d’Estudis Aranesi ei era nauta investigacion e estudi der aranés e er establiment des critèris de normativa d’acòrd damb es principis dera Gramatica occitana de Loís Alibèrt e es Normes ortografiques der aranés, coma part integranta der espaci lingüistic e culturau occitan.
Atau madeish, a de collaborar, de conformitat damb aguesti madeishi principis, damb entitats academiques, de recèrca o culturaus reconeishudes pes institucions publiques der espaci occitan, en establiment dera normativa lingüistica de referéncia entath conjunt dera lengua occitana.
Er Institut d’Estudis Aranesi deven damb aguest decret era autoritat entar assessorament en matèria de lengua occitana, aranés en Aran, entàs administracions publiques e es organismes que ne depenen, entàs centres d’ensenhament publics e privats e entàs mieis de comunicacion de titularitat publica.
Eth Govèrn dera Generalitat e eth Conselh Generau d’Aran an impulsat amassa eth procès entà qu’er Institut d’Estudis Aranesi age eth caractèr d’acadèmia, atau coma preve era Lei der occitan, aranés en Aran, der an 2010.
Tirat de: www.gencat.cat